Sortzen Laguntzeko Guneak (SLG) ekipamendu fisikoak dira, eta herritarrek duten sortzeko eskubidea errazteko baldintza egokiak eskaintzeko helburua dute, sorkuntza hori libreki eta partaidetza bidez egiteko, bai maila profesionalean bai amateur moduan.

Eginkizun hori betetzeko, SLGek azpiegitura eta baliabide materialak eta immaterialak dituzte eskura eta askotariko zerbitzu eta programak eskaintzen dituzte, intentsitate maila edo maiztasun ezberdinekin, baina modu iraunkor eta egonkorrean. Sortzeko zuzeneko laguntza da gune horien jarduera nagusia, batez ere prestakuntza-espezializazioari, ikerketa-esperimentazioari eta ekoizpenari (saiakuntza-prototipatze edo postprodukzio faseak barne) dagokienez. Era berean, informazio, aholkularitza, laguntza eta gaikuntza zerbitzuak ere eskaintzen dituzte sarritan, finantzaketaren, administrazio eta kudeaketaren, lankidetzaren, bitartekaritzaren, sustapenaren, mugikortasunaren eta nazioartekotzearen arloetan. Horrez gain, zeharkako moduan, gune hauen arrakastaren arrazoia da harremanak, ekimenak eta testuinguruak modu arduratsu eta osasuntsuan ahalbidetzeko duten gaitasun alkimikoa, eta norberaren irudimena zein irudimen kolektiboa pizteko denbora sortzea.

SLGak mota askotakoak dira: ekoizpen artistiko eta kulturalerako zentroak, sorkuntzarako egonaldiak, kultura komunitariorako ateneoak, herritarren laborategiak, maker espazioak, eta baita erabilera anitzeko ekipamenduak, ekipamendu hibridoak edota beste gune batzuetan txertatuta dauden guneak ere, hala nola mediatekak, antzokiak, museoak edo bestelako espazio estrakulturalak, besteak beste,eskolak, osasun zentroak, kiroldegiak, klima babeslekuak, etab.

Gainera, askotariko ezaugarriak izaten dituzte ere: kokalekua, tamaina, titulartasuna, gobernantza, zerbitzu zorroa, hartzaile mota, espezializazio maila, lurralde irismena edo diziplina izaera, diziplina anitzeko izaera zein diziplina arteko izaera.

TIPOTOKIAK taldeak arreta berezia jartzen du gune independente eta/edo sortu berrietan, oro har prekarietate endemikoa bizi baitute, bideragarritasunari eta jarraitutasunari buruzko ziurgabetasun handiarekin eta sortzen laguntzeko ekosistema instituzionalean egotearen egokitasunari buruzko etengabeko zalantzekin. Hala ere, arreta horrekin batera, SLG publikoekiko irekitasuna eta konexioa ere bilatzen dira, lankidetza loturak sustatzeko, formula mistoak bilatzeko eta berrikuntza aukerak sortzeko; hori guztia sortzeko eskubidea ahalik eta modu zabal, dibertsifikatu, irisgarri, ireki eta demokratikoan baliatu dadin lortzeko.